پشاور (اسٹاف رپورٹر) ڈائریکٹوریٹ آف ایلیمنٹری اینڈ سیکنڈری ایجوکیشن خیبر پختونخوا کی جانب سے سرکاری اسکولوں میں طلبہ سے وصول کیے جانے والے فنڈز اور فیسوں میں نظرثانی کی گئی ہے، جو فوری طور پر نافذ العمل ہوں گی۔ نئی شرحوں کے مطابق کھیلوں (Sports) فنڈ گریڈ 6 کے لیے 30 روپے، گریڈ 8 کے لیے 50 روپے، گریڈ 9-10 کے لیے 40 روپے (پہلے 30 روپے) اور گریڈ 11-12 کے لیے 80 روپے (پہلے 60 روپے) مقرر کیا گیا ہے۔ امتحانی فیس گریڈ 6 کے لیے 40 روپے، گریڈ 8 کے لیے 70 روپے، گریڈ 9-10 کے لیے 50 روپے (پہلے 20 روپے) اور گریڈ 11-12 کے لیے 50 روپے (پہلے 40 روپے) ہوگی۔
اسی طرح طبی سہولت (Medical) فیس گریڈ 6 کے لیے 10 روپے، گریڈ 8 کے لیے 15 روپے، گریڈ 9-10 کے لیے 10 روپے (پہلے 8 روپے) اور گریڈ 11-12 کے لیے 20 روپے (پہلے 10 روپے) مقرر کی گئی ہے۔ غریب طلبہ فنڈ گریڈ 6 کے لیے 8 روپے، گریڈ 8 کے لیے 12 روپے، گریڈ 9-10 کے لیے 10 روپے (پہلے 8 روپے) اور گریڈ 11-12 کے لیے 20 روپے (پہلے 10 روپے) ہوگا۔ ریڈ کریسنٹ فنڈ گریڈ 9-10 کے لیے 5 روپے (نئی شمولیت) ہوگی۔ لائبریری فیس گریڈ 9-10 کے لیے 80 روپے (پہلے 50 روپے) اور گریڈ 11-12 کے لیے 100 روپے (پہلے 80 روپے) مقرر کی گئی ہے۔ اسکاؤٹ/روور فنڈ (صرف لڑکوں کے لیے) گریڈ 6 تا 10 کے لیے 35 روپے اور گریڈ 11-12 کے لیے 50 روپے ہوگی، جبکہ شاہین فنڈ (صرف لڑکوں کے لیے) گریڈ 6 کے لیے 5 روپے اور گرلز گائیڈ فنڈ بھی 5 روپے ہوگا۔
داخلہ فیس گریڈ 9-10 کے لیے 250 روپے (پہلے 130 روپے) مقرر کی گئی ہے۔ ٹیوشن فیس میں بھی اضافہ کیا گیا ہے، جس کے مطابق سائنس ٹیوشن فیس گریڈ 11-12 کے لیے 500 روپے (پہلے 400 روپے) اور آرٹس ٹیوشن فیس 400 روپے (پہلے 350 روپے) ہوگی۔ لیٹ سرٹیفکیٹ فیس گریڈ 9-10 کے لیے 50 روپے (پہلے 25 روپے) اور ڈپلیکٹ سرٹیفکیٹ فیس بھی 50 روپے (پہلے 25 روپے) مقرر کی گئی ہے۔ سیکیورٹی فیس گریڈ 11-12 کے لیے 500 روپے ہوگی، جو پہلے نہیں لی جاتی تھی۔ غیر حاضری جرمانہ تمام گریڈز کے لیے 10 روپے (پہلے 5 روپے) ہوگا۔
حکومت خیبر پختونخوا نے تمام ضلعی ایجوکیشن افسران کو ہدایت دی ہے کہ وہ ان نئی شرحوں پر فوری عملدرآمد یقینی بنائیں۔ یہ فیسیں خیبر پختونخوا کے تمام سرکاری اسکولوں پر لاگو ہوں گی۔