ہری پور (تعلیم نامہ نیوز)
گورنمنٹ ہائر سیکنڈری سکول جھامرہ (تحصیل غازی) کے پرنسپل ڈاکٹر عمران خان نے یونیورسٹی آف ہری پور سے کامیابی کے ساتھ اپنے پی ایچ ڈی مقالے کا دفاع کر کے پی ایچ ڈی کی ڈگری مکمل کر لی ہے۔
ڈاکٹر عمران خان کا تحقیقی مقالہ
“انگریزی لکھنے میں طلبہ کی تعلیمی کارکردگی، خود فیصلے کرنے کی صلاحیت، اور سوچنے سمجھنے کی قوت پر مختلف تدریسی طریقوں کے اثرات”
کے موضوع پر مبنی تھا، جس میں انہوں نے موجودہ تعلیمی نظام میں طلبہ کی زبان، فہم اور تنقیدی سوچ کی نشوونما پر روشنی ڈالی۔
یہ کامیابی نہ صرف ان کی ذاتی محنت کا نتیجہ ہے بلکہ یہ ضلع ہری پور اور تحصیل غازی کے تعلیمی شعبے کے لیے بھی ایک اہم سنگِ میل ہے۔ ان کی یہ علمی کاوش مستقبل کے اساتذہ اور محققین کے لیے بھی رہنمائی کا باعث بنے گی۔
تعلیمی و علمی حلقوں نے ڈاکٹر عمران خان کو اس نمایاں کامیابی پر مبارکباد پیش کی ہے اور توقع ظاہر کی ہے کہ وہ اپنے تجربات اور تحقیق سے مقامی سطح پر تعلیم کے معیار کو مزید بہتر بنانے میں کردار ادا کریں گے۔