پشاور (نمائندہ تعلیم نامہ)
خیبر پختونخوا پرائیویٹ اسکولز ریگولیٹری اتھارٹی (پی ایس آراے ) نے نجی تعلیمی اداروں کو سالانہ فیس، داخلہ فیس یا کسی بھی دوسرے عنوان سے اضافی فیس لینے سے روک دیا ہے۔ 25 مارچ 2024 کو جاری کردہ اعلامیے کے مطابق، صرف ماہانہ ٹیوشن فیس کی اجازت ہوگی، جبکہ دیگر تمام فیسیں خلافِ قانون تصور کی جائیں گی۔
پی ایس آر اے کے ترجمان کے مطابق یہ ہدایت KP-PSRA ریگولیشنز 2018 کی شق 7(4)(IV) اور پشاور ہائی کورٹ کے فیصلے WP No. 1995-P of 2020 (مورخہ 14 دسمبر 2021) کی روشنی میں جاری کی گئی ہے۔
اعلامیے میں واضح کیا گیا ہے کہ کئی نجی اسکول، سابقہ ہدایات کے باوجود، داخلہ اور سالانہ فیس کی مد میں رقوم وصول کر رہے تھے، جو کہ نہ صرف خلاف ضابطہ ہے بلکہ عدالتی احکامات کی بھی خلاف ورزی ہے۔
اتھارٹی نے خبردار کیا ہے کہ جو تعلیمی ادارے ان ہدایات پر عملدرآمد نہیں کریں گے، ان کے خلاف سخت قانونی کارروائی کی جائے گی۔ اس سلسلے میں والدین سے بھی کہا گیا ہے کہ وہ ایسے کسی بھی واقعے کی صورت میں PSRA کے آفیشل پورٹل پر شکایت درج کروائیں۔
ترجمان نے مزید کہا کہ تعلیم کو سادہ، منصفانہ اور سب کے لیے قابل رسائی بنانے کے لیے صرف ماہانہ فیس ہی وصول کی جا سکتی ہے۔ کوئی بھی اضافی فیس غریب والدین کے لیے بوجھ بنتی ہے، جس کا خاتمہ ناگزیر ہے۔